چهارشنبه 24 مرداد 1397
دوشنبه 3 خرداد 1395 - 08:07:05 چاپ

شعر مازندرانی "زبانحال مادر" تقدیم به شهید مدافع حرم سید رضا طاهر

استان‌ها > مازندران - خـــور بمـــــو پسر پرواز هــکرده
دتــا دسه خــــــداسه واز هــکرده

خـــور بمـــــو پسر پرواز هــکرده
دتــا دسه خــــــداسه واز هــکرده
خلـه سخته پسر شـو تا صـــواحی
خـلـه سخته پسر جــان تـه جـدایی
پیغـوم بمـــو حــــرم نا امـن بهییه
حـــــرم ور پـــر از دشمـن بهییه
پسر پیرن سپــاهـی تــن دکـــرده
وه بورده اونجه راسی جنگ هکرده
پسر بیهه جــوون دل پــاره بوه
پلنگه مــــــازرون دل پــاره بوه
ته حملـه دشمنــونه زار هکـرده
ته دس دشمن بورده فرار هکرده
بمیره دشمــن نـامــــرد و کــافر
تره زار زار بکوشته دمـــه آخر
الهی ریشه ی دشمن تش هیره
دبــاره امنیت دنیـــا ســر هیره
پسر دشمنـه زمین گیر هکــرده
خله ره اون دیـاری تیر هـکرده
هچی بوم خـــدایی تــــوم نهونه
مه این بشکسه دل آروم نهونه
دس و دیمـه ورم دل پـاره بــوه
مـــدافعــه حـــرم دل پـاره بــوه
ته صورت خون هاشی دل بونه پاره
دس و دیم خاک هاشی دل بونه پاره
فــــدای زینبه مــه خـــاره ریکــا
کجــــه اســا وره هـکنم پیـــــدا
همش راهـه حسینه داشته سینه
دونسمه وه شــونه دیگـــه نینه
گتـه حـــرم اسـا نـــاامـــن بهییه
جنگ اونجه راسی تن به تن بهییه
گته شومبه حرم که حفظ بواشه
حـــرم این دشمنــونه جـا نباشه
ته کویی من ته وسه بیمه دلتنگ
ملــه دلــه همـه تـره کنـه ونگ
ونگ کمبه شه خــدا ته مار بمیره
مــه پهلــوون ریکــا ته مار بمیره
جمـع بینه رفقـــا تـــه مار بمیره
نــواجش دنـــه مــار ته مار بمیره
تو بوردی آسمون نم نم دهیته
دتــا چشـه درس شبنـــم بهیته
ته بوردن همه جاره ونگ هکرده
همــه رفقـــونه دلتنگ هکـــرده
ته وسه روز و شو دل بیقراره
تـه پیرن تـن درسی پـاره پـاره
حسین وار بوردی و پرواز هکردی
دتـا چشه خــــداور واز هکردی
پسر ته دوری مره پیر هکـرده
بیقـــراری مـــره اسیر هکـرده

ته عکسه ناز دمبه طاقچه بالا
تــو دمبه خــونـدمـه لالایی لالا
پسر مــه نمـونه ته دور بگردم
مه درد توم نهونه ته دور بگردم
مه سرخنه ی سـو مـه خار ریکا
همیشه ویمبه خو مه خاره ریکا
لباسه پلنگـی تــه مـــــار بمیره
مـه عمـر و زندگی ته مار بمیره
وه نوجـوون بیهه ته مار بمیره
جنگ کرده سوریه ته مار بمیره
یا زینب کردی ونگ من ته بلاره
خـدایی کـردی جنگ من ته بلاره
پـرسی سنگ و دشته تـه بــلاره
چک هیته تیر ته کشه ته بــلاره
ذوق کمبه تـو شهیدی ته ننامــه
بــرمــه نکمبــه ته سه روبــرامـه
همش یــاد شهیــد کـــــربـلامـه
عــــــزاداره حسین سرجــدامـه
بمــــونـه همسفر هنتا نمـــویی
بشکسه مــه کمـــر هنتا نمویی
دتا چش دره را تا تــو دگــردی
ملــه ره زمبه پا تا تـو دگــردی
ته دستبنویشته پسر جـا بـدامه
غم و غصه ی ســـره لا بـدامه
دمـه در پـرچــم کشور بـزومی
ته عکسه گـد اتاقه ور بزومی
پسر تیسابه مه ته تابوت همرا
رفقــونه دس دری بوردی بالا

ته تابوت پرچم ایران چه خاره
گلـه پــرپــر بمـویی ته بــلاره
تـه تشنـا وشنـا گلــی ی بـلاره
هیچکی دنبیهه ته پلی ی بلاره
مــه پسر جـان شیر مــازندرانه
وه تی تی ی گله بشکسته جانه
مه پسر بورده میدون خنده خنده
وه هسه اهلــــه روستا هریکنده
پسر شیر دیـــــار علـــوی یه
وه پیــــرو خـط سید علــی یه
شه حرفه رهبره وه گوش هکرده
شربت شهادته نوش هکرده
خش بمـویی وچه خشال بهیمه
ته بوره اشدومه سرحال بهیمه
طاهری ته سه شعر از دل بساته
ته خـــوبی ره ونــه دلـــه بپاته

 

2 دیدگاه
  • بی نام
    دوشنبه 3 خرداد 1395 - 09:38:36
    پاسخ
    2 0

    همشهری حرف دل بزویی ته دست درد نکنه

  • میر حمزه طاهری هریکنده ای نوپا
    شنبه 8 خرداد 1395 - 09:00:53
    پاسخ
    1 0

    با سلام ممنون از اینکه شعر بنده را گنجاندید . ولی نام بنده در انتهای شعر ذکر نشده است با تشکر

ارسال دیدگاه

قوانین ارسال نظر
  • خبرآنلاین نظراتی را که حاوی توهین یا افترا است، منتشر نمی‌کند
  • لطفا از نوشتن نظرات خود به صورت حروف لاتین (فینگلیش) خودداری کنید
  • اگرچه تلاش می‌شود نظرات ظرف 2ساعت تعیین تکلیف شوند اما نظراتی که پس از ساعت 19 نوشته شود حداکثر تا 9 صبح روز بعد منتشر می‌شوند
  • با توجه به آن که امکان موافقت یا مخالفت با محتوای نظرات وجود دارد، معمولا نظراتی که محتوای مشابه دارند، انتشار نمی‌یابند بنابراین توصيه مي‌شود از مثبت و منفی استفاده کنید.

0/700

پربیننده‌ترین
آخرین مطالب